xplace? Noch nie gehört! Was is xplace? Der xplace is einfach ein Platzerl, das ich mir hergrichtet hab um Mods zu testen. Ursprünglich zumindest war's so gedacht. Weil der xplace aber so geworden is, wie er eben geworden is, is er auch ein Platzerl zum Spaß haben und wie dieser Spaß ausschaut ...

Erstbefahrung mit mein CJ und glaubts mir, ich hab jedes Zitzerl vom Drehmoment gebraucht! Leider gibt's weder pix noch a Video von der Fahrt, aber es gibt einen Augen-, Ohren und Geschmackszeugen* - den Robert.

Die Einfahrt is eh easy. Do geht's nur leicht obe und bevorst untn bist musst schon voll rechts einlenkn, weilst praktisch in da Böschung (ca. 4m hoch) wieda aufe muasst. Obn host grod sovül Plotz wie's Auto long is um wieda zu wenden und hintan Bam obezfoan. Donn geht's gmiatlich zick-zack durchn Wold bist vorm Steilhang stehst. Do stehst donn und denkst "Vollgas". Vollgas reicht oba nit. Da Hong is total lose, guate 8m hoch, untn sehr steil und im obaran Drittl fost senkrecht. Links und rechts sein Bama, oba genau so weit weg, doss sich der jeep nit locka onlant folls er follt, sondern vorher speedy weat.

Du merkst doss Vollgas nit greicht hot, weil du bis zum Onfong vom oberen Drittl kummen bist. Jetz warat's normalerweise so, dasst dort steckst und die im Sitz umdrahst und longsom oberollst. Dafür is durt oba zsteil und da Boden zlocka. Du bist praktisch schon längst wieda volle Wäsch obewärts unterwegs bevor du merkst dosst nit aufekummen bist. Oke: wir gehn davon aus, dosst irgendwie wieda durt bis wo du den Vollgas-Gedonkn gedocht host. Jetz zittast a bissl. Zumindest is mir so gongan. Du host des Problem, dosst dei Auto doch a bissl gern host und nix riskiern wüllst. Ondaraseits warat's schon fein, wennst aufe kummst und da Star bist. De anzige Lösung is etwas mehr Anlauf und Vollgas.

Da 5.9er is Gott sei Dank recht spritzig wennst di nix scheißt und kriagt a ordntliches Tempo zomm. Des Problem dabei is hiatz oba, dosst nit auf ana Grodn Onlauf nehman konnst und deswegn die Einfoat in Steilhong nimmer so genau dawischt. Folls jetz wos danebn geht, is also echt nit guat! Is oba nix danebn gongan, ga Robert. Mia hom des oba bade nit gmerkt, doss nix danebn gongan is. Du konnst nämlich als Durchschnittmensch nur a giwisse Menge von Eindrückn zgleich verorbeitn und der Rest bleibt holt unerledigt. Des kummt donn später irgendwonn ausa und du erschreckst die 2 Stund späta. Die übawiegenden Eindrücke im Steilhang mit Vollgas noch längerem Onlauf aus da Kurvn aus sein, doss es da in da Kompression den Kopf zwischn die Schultan druckt, doss da die Oaschbockn fost aufgehn wennst ins Steile kummst und doss du donn obn on da Kantn ziemlich rotlos bist, wie du die auf die Londung einstöln sollst. Da Plotz obn is nämlich nur gonz a kurzes Stickl länga wie da Jeep und du bist doch mit da Vorderax etwas in da Luft. Wahrscheinlich! Weil segn tuast es nit, da Dreck fliagt jo in olle Richtungen um die uma. De TSL grobn vuan und hintn wie 1000 südafrikanische Diamantnjäga.

Zur Londung komm i nit wirklich gsichate Infos gebn. Eigentlich hob i erst gmerkt doss ma stehn, wie da Lichscholta vom CJ bei mein Kopf vorbeigflogn is. Mir hot's nämlich die Fias derort in die Häh grissn, doss i mitn Knia den Scholta obgebrochn hob. Der Schmerzeindruck is kurz nochn optischn Eindruck des vorbeifliegendn Lichtscholters durchs Hirn gschossn. Irgendwie woa i do unta Stress weil i jo den Robert als Co mtighobt hob, der nur mehr glocht hot und i wollt zumindest an kontrolliertn Eindruck hintalossn. I hob also mei Pappn gholtn, weil e ois folsch gwesn warat, wos i gsogt hätt.

Da xplace geht donn so weita, doss es a kurzes ebenes Stickl gibt bevors a poa m ziemlich direkt obe geht. Untn glei wieda schoaff links und üba Wölln rechts in Wold eine. An engen 360°-Turn und die gleiche Streckn zruck. Des kurze direkte Obwärtsstickl is jetz aufe a Problem. Wennst di in da Folllinie unten zuabestölst stehst hintn beim Bam on und vuane is weniga wie 1m Plotz bevors quasi ziemlich aufe geht. Also zfuass brauchst do nix probiern! Do gehts nur mit ho-ruck und hoffntlich reicht's! S'hot greicht. Donn obn wieda des ebene Stickl ume zum Steilhang.

Du foast mit die Vuadaradln eine und denkst nur noch a Stickl, donn bleib i amol stehn und schau obe. Denkste! Vül zsteil zum Stehnbleibn. Do geht's nur mehr dahin. Is oba e glei vorbei und da Stab legt sich a mit da Zeit. Außadem bist eh schon total dreckat bis in die Lungan eine. Danoch kurz vaschnaufn beim zick-zack durchn Wold bis zur Kurvn die am Onfong glei noch da Einfoat kumman is, jetz also vor da Ausfoat kummt. De is jetz insofern a Schaß, weilst beim Zruckfoan aufwärts noch den lockaren Bodn host und fost ka Plotz is um irgndan ondan Weg zu probiert. Oba a des wean hoffntlich a poa von eich sölba segn.

Donn foast ums Haus uma, stöllstn Jeep ob und setzt die mit an Bier bei mir in die Sunn. Irgend wonn kummt donn der erwähnte Moment wo da de Sochn zum Wehtuan onfongan, dest da anghaut host ...

*der hot ols Beifahrer genau so vül Dreck gschluckt wie i ols Foara

finisher - Zeitwertung

13.03.2007: xmario, CJ7 5.9 - done in 8:19

26.07.2007: xmario, CJ7 5.9 - done in 5:46

28.09.2008: wuze, TJ 2.5 - done in 15:00

28.09.2008: xmario, TJ 4.0 - done in 6:45

5.10.2008: M-Spider, TJ 4.0 - done in 12:02

finisher - Punktwertung
(Retour 3 Pkt., Winch 20 Pkt.)

13.10.2008: xmario, TJ 4.0 - done with 27 Pkt. (9x3)

17.10.2008: xmario, TJ 4.0 - done with 21 Pkt. (7x3)